Skip to main content
التجاره علي الانترنت

ليه انت محتاج تكون انت وتجارتك علي الانترنت

مقدمة:

دايماً التجارة كانت الطريق المضمون بإنك تكسب فلوس ولكن التجارة عامة مرت بمراحل كتير جداً قديماً وحديثاً والتاجر زمان كان بيسافر مئات بل آلاف الكيلومترات عشان يشتري بضاعته ويبيعها ، إلى أن الزمن بدأ يتطور والتاجر بقى عنده محل يعرض فيه بضاعته ويبيعها ويشتري غيرها ويبيعها وهكذا.

 لكن الزمن مهما كان لازم يتطور ويتحدث ومن زمن سبعينات القرن الماضي وإلى الآن ظهر مفهوم جديد كلياً للتجارة ، وهي التجارة الإلكترونية الي فعلا بدأت الشركات الصناعية في سبعينات القرن الماضي بإستخدامها عن طريق تبادل المعلومات الإلكترونية ، وحالياً مش بس الشركات الصناعية بتستخدم التجارة الإكترونية لأ ده كمان الشركات الصغيرة والمحلات الصغيرة كمان ومش بس كدة ممكن لأي فرد عادي يتاجر إلكترونياً من غير ما يكون عنده محل أو مكان ليعرض بيه بضاعته.

 لكن لازم أول حاجة نفهم يعني إيه تجارة إلكترونية وبعض العناصر المهمة فيها:

تعريفها :

هي عملية بيع وشراء البضائع و تبادل المعلومات والبيانات عن طريق شبكة الإنترنت الداخلية والخارجية.

بعض المصطلحات الهامة:

الأعمال الإلكترونية (e-business) :

هو التعريف الاشمل و الأوسع للتجارة الإلكترونية يتكون من  خدمة العملاء والتعاون مع الشركاء التجاريين وإجراء المعاملات الإلكترونية داخل المنظمة وأيضاً يجري عملية تبادل أو بيع أو شراء البضائع والخدمات و المعلومات.

السوق الإلكتروني :(e-marketplace)  

هو عبارة عن سوق مفتوح وكبير يلتقي فيه البائع والمشتري لتبادل البضائع، الخدمات، المال والمعلومات عن طريق الإنترنت.

  • في سؤال مهم جداً لازم نعرفه وهو ليه مهم إن يكون ليا مكان أنا وتجارتي على الإنترنت؟ وايه اهمية وجود متجر إلكتروني خاص بيا ؟
  • والإجابة بسيطة جداً : وتتمثل في الدعاية والإعلان والشهرة و توفير

 ( الوقت – الجهد – المال ) طب هتقولي ازاي؟

برضوا الإجابة بسيطة :

  • الدعاية والإعلان والشهرة : لازم تعمل دعاية واعلان لمنتجاتك عشان الناس تتعرف عليك ويشتروا منك في أي وقت وأي مكان ولازم يكون عندك منتجات كويسة لأن ده هيفرق جامد في ربحك ولازم تشتهر بكدة لإن شهرتك ومصداقيتك هيفرقوا كتير جداً في عالم الإنترنت خصوصاً ان ده عالم مفتوح وفيه منافسين كتير فالدعاية والإعلان أحد سبل نجاحك في الإنترنت .
  • الوقت : تتمثل في سرعة بيع المنتج ، دلوقت انت مش مضطر تستنى الزبون يجي لحد عندك هو ممكن يشتري وهو في أي مكان فأكيد انت كمان هتكسب في أي وقت .
  • الجهد : انت بتعرض منتجك على الإنترنت فأكيد انت مش هتتعب في حاجة زي كدة تخيل معايا مكسب من غير تعب !!
  • المال : هنا انت مش مضطر تشتري بضاعة كتير وتملى بيه محلك لأ انت ممكن تشتري قليل وتقلل التكلفة وتعرض على الإنترنت وتكسب كتير ، وأكيد الموضوع ده هيكون مناسب أكتر للناس الي معندهاش محلات. بحيث انك مش هتحتاج اي سجل تجاري او تكاليف اضافيه .
  • عدد مستخدمين جوجل ومنصات التواصل الاجتماعي في مصر:

منصات التواصل الإجتماعي دايماً كانت شيئ مهم جداً للناس عامة وللمصريين خاصة عشان كدة لازم تعرف إزاي منصات التواصل الإجتماعي قدرت تخلي الناس تهتم بيها و وصل فيها إشتراكات قد ايه .

حيث تصدّر موقع التواصل الاجتماعي (فيسبوك) قائمة المنصات الاجتماعية الي بيستخدمها أكتر المصريين حيث في شهر يناير الماضي،  النسبة بلغت 91%، بحسب تقرير مؤسسة we are social لأبحاث الإنترنت.

وموقع يوتيوب جه فى المركز الثاني بنسبة 89%، وبعدين تطبيق المحادثة النصية (واتس آب) بنسبة 79%، ويليه فيسبوك ماسنجر بنسبة 73%.

اما تطبيق مشاركة الصور (إنستجرام) احتل المركز الخامس بنسبة 68%، ثم جاء موقع تويتر بنسبة 52%، يليه موقع التوظيف المهني “لينكد إن” سابعًا.

واحتل موقع سناب شات لمشاركة الصور، المركز الثامن بنسبة 25%، أعقبه تطبيق بنتريست بنفس النسبة، بينما أخذ  تطبيق تيك توك المركز العاشر بنسبة 24%.

ويقدر عدد مستخدمي منصات التواصل الاجتماعي النشطين إلى 42 مليون مستخدم.

ويوضح الجراف التفاعلي التالي ترتيب أكثر 10 منصات اجتماعية استخدامًا من قِبل المصريين خلال يناير 2020

  • أنواع المتاجر الإلكترونية :

 

أنواع المتاجر كتير زي مثلاً :

 ( سوق البيع – سوق الشراء – سوق التبادل – السوق الإلكتروني الخاص – السوق الإلكتروني العام – التحالف التجاري –  جوجل بيزنس – صفحة فيس بوك  )

 

إحنا هنتكلم عن جزئين مهمين وهما المفيدين أكتر:

 ( جوجل بيزنس – صفحة فيس بوك )

  • جوجل بيزنس :

جوجل في خلال السنوات الماضية عملت على تطوير وتحسين الخدمة وتخصيص واجهة لأصحاب الأعمال المحلية بشكل خاص، وهي امتداد لخدمة  google places والي  كانت مدمجة مع خرائط جوجل ، وكانت بتتميز إنها تقدم خاصية تعريف المنشآت داخل الخريطة من غير تقديم تفاصيل شاملة.

لكن  دلوقت  كل أصحاب العمل مدعوون لإنشاء حساب جديد وإظهار بيانات منشآتهم أو أعمالهم المحلية على الخريطة وعلى محرك البحث.

التسجيل مجاني لكن بيتطلب بعض الخطوات التي من خلالها تقوم بتعريف عملك وتحديد مكانه في الخريطة، وبعدين هيبقى باقي خطوة أخيرة أساسية لا يتم البدء إلا بها، وهي التحقق من أنك صاحب العمل أو المخول بإدارته، عن طريق إرسال كود التفعيل إلى عنوان عملك الذي قمت بتعريفه في البداية (في ورقة مغلفة)،

وعليك بإدخال ذلك الكود كي تتمكن بعد ذلك من الاستفادة من جميع المميزات والخصائص المقدمة عبر هذه الخدمة، والتي سنقوم باستعراضها في النقاط التالية:

1- التواجد على الخريطة : ودي خدمة مميزة بتخلي الي بيبحث عنك يجدك بسهولة عن طريق الخريطة.

2- معلومات شاملة  زي :

 ( عنوان المحل – رقم الهاتف – مواعيد العمل – الموقع الإلكتروني )

3- التواصل مع العملاء : وده عن طريق المعلومات الي قولناها في النقطة السابقة حيث هيتم تعديل النقاط دي عن طريقك لسهولة التواصل مع العملاء.

4- مساحة للنشر والكتابة : ويمكن هنا تضيف وصف لمنتجاتك وبعض الصور ليها

5- موقع إلكتروني مجاني : وهنا هيتم إنشاء موقع بشكل آلي عن طريق المعلومات الي ضفتها وده هيسهل في نشر متجرك وعملية البيع

للوصول إلى المصادر إضغط ( هنا )

  • صفحة الفيس بوك :

موقع التواصل الإجتماعي فيسبوك يعتبر أشهر موقع في العالم و هو غني عن التعريف فهو الموقع الذي يضم أكبر عدد من مستخدمي الإنترنت في العالم، بتعداد أكتر من الملياري مستخدم وهو عدد لايتوفر علي غيره من المواقع.

عشان كدة كان من المهم لكل من يمتلك شركة أو عمل أو منتج ما أو إذا كان شخصية عامة أو مؤثرة أن يمتلك صفحة علي فيسبوك تسهل التواصل مع الجمهور والمعجبين والأصدقاء، عشان كدة إنشاء صفحة فيس بوك مهم جداً وليه مميزات وفوائد تعالوا نتعرف عليها :

1- أكبر قاعدة عملاء متاحة على الإنترنت : في السابق قولنا ان أكتر من 2 مليار مستخدم للفيس بوك بمختلف الأعمار فأكيد هتكون قاعدة كبيرة ومهمة جداً لبدأ مشروعك.

2- إستهداف أفضل للعملاء : وده عن طريق دفع فلوس لإعلانات بتستهدف فئة معينة صاحب العمل راغب في استهدافها وتكون مناسبة للمنتج .

3– تطوير الحملات التسويقية بناءً على تحليل الآداء : فيس بوك بيتميز إنه بيقدملك تحليل إحصائي عن مثلاً: ( عدد الجمهور المتابع لصفحتك – عدد الزيارات اليومية لصفحتك – عدد المتابعين اليومي لمحتوى صفحتك – الفئات العمرية للصفحة ) وغيرها الكثير.

4– أفضل لتوفير الوقت والتكاليف : أي حملة إعلانية عادية وتقليدية بتستغرق وقت وجهد من تصميمات وتراخيص وما إلى ذلك

لكن بمجرد إنك تعمل صفحة على الفيس بوك أي معوقات هتختفي من أمامك للسهولة واليسر وتوفير الوقت والمال والجهد والإجراءات الروتينية.

5- زيادة ثقة العملاء في نشاطك التجاري :  فيس بوك بيوفر ميزة مهمة جداً وهي التقييم حيث ممكن للناس يعملوا تقييمات لصفحتك ومنتجاتك وده بيأدي إلى زيادة الموثوقية والتقييمات الإيجابية لصفحتك فأكيد زيادة التفاعل على صفحتك وشهرتها أكتر.

للوصول للمصادر إضغط ( هنا )

  • مميزات المتجر الإلكتروني :

في مميزات كتير للمتجر الإلكتروني وهو أكيد عكس المتجر التقليدي من حيث إنه مش مطلوب منك الروتين الممل و المعقد من سجل تجاري وترخيص محل إلى شهر عقاري وما إلى ذلك فهو على العكس تماما هو عالم مفتوح من غير قيود تقدر تربح منه وتعرض منتجك في أي وقت و أي مكان.

لكن في مميزات عامة للمتجر الإلكتروني وهنسردها في النقاط التالية على سبيل المثال وليس الحصر:

  • ممكن توصل لعدد كبير جداً من المستخدمين في العالم لعرض بضاعتك عن طريق نشرك لموقعك عن طريق شبكات التواصل الاجتماعي او غيرها من الشكبات ولا تنحصر على زبائن محليين.
  • ممكن تستقبل كميات كبيرة جداً من الطلبات في خلال 24 ساعه حتى وانت نائم ، بحيث إن المتجر موجود على طول.
  • ممكن للعميل إنه يدفع عن طريق البطاقات الإتمانيه وطرق الدفع الإلكترونيه الاخرى مثل الباي بال وكاش يو وون كارد.
  • تكلفة فتح متجرك بتبقى قليلة على عكس المحلات الموجوده في الأسواق والتي تحتاج الى مبالغ كبيرة جداً لتبدأ مشروعك.
  • ممكن تشتغل وانت ف البيت وكمان توظف كوادر عامله وهما في منزلهم.
  • ممكن للعميل إنه يشوف المنتج الي هو عايزه وحتى الي إتباع منها .
  • سعر البضاعه في الغالب بتكون اقل من السعر الموجود في الاسواق بسبب ان تكاليف المتجر الالكتروني بتبقى  أقل مقارنه بالمتاجر الموجوده في الاسواق.

للوصول للمصادر اضغط ( هنا )

  • أمثلة عن أكبر المتاجر الإلكترونية العالمية :

أكيد المتاجر الإلكترونية كتير جداً لكن في متاجر تعتبر هي الأنجح والأكبر والمتاجر دي صعب إنها تخسر ودايماً بتكسب خصوصا الأيام دي الي فيروس كورونا إجتاح العالم فيها .

كل المشاريع والشركات والمصانع توقفت وخسرت بل ودول كاملة خسرت إقتصادياً ، لكن الحقيقة إن المتاجر الإلكترونية هي الوحيدة الي كسبت أضعاف أضعاف الي كانت بتكسبه قبل كدة

 لإن كل الناس بدأت تتجه للمتاجر دي وللشراء منها ومن أمثلة المتاجر دي :

( أمازون – جوميا – سوق ) :

 

1- متجر أمازون : هو متجر تم تأسيسيه سنة 1994 من قبل جيف بيزوس ومقره في سياتل واشنطن وهو يعتبر أكبر متاجر التجزئة القائمة على الإنترنت في العالم من حيث إجمالي المبيعات والقيمة السوقية.

 

للدخول علي متجر امازون إضغط  ( هنا )

 

2- متجر جوميا : ‏ هي شركة تسوق إلكتروني إفريقية للمنتجات الإلكترونية والأزياء وغيرها وتأسست في عام 2012

 

للدخول علي متجر جوميا إضغط ( هنا )

 

3- متجر سوق : هي شركة إماراتية يقع مقرها الرئيسي في دبي  تعد واحدة من أكبر المتاجر الإلكترونية في الوطن العربي، ويضم أكثر من 400000 منتج ولها فروع في العديد من الدول العربية ، وفي 2017 شركة أمازون إستحوذت بالكامل على شركة سوق .

 

للدخول علي متجر سوق إضغط ( هنا )

 

  • في النهايه احب اوضح لحضراتكم ان العصر الي إحنا فيه عصر التقدم التكنولوجي وحالياً العالم كله بيتجه للإنترنت للحصول على إحتياجاته ودول كتير بدأت في التحول الرقمي ومنها مصر والمحنة الي العالم فيها حالياً أثبتت قد إيه إن التجارة الإلكترونية هامة جداً وإنها ممكن تتخطى أي عقبات  عالمية .

     

0 Shares

Notice: ob_end_flush(): failed to send buffer of zlib output compression (0) in /home/yallagomla/public_html/blog/wp-includes/functions.php on line 4673